වර්තමානයේ පවතින තත්ත්වය මත ඉදිරියේදී නැවත වතාවක් රට වසා දැමීමේ අවදානමක් ඇති විය හැකි බව ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමය සඳහන් කරයි.
මාධ්‍ය හමුවක් අමතමින් එම සංගමයේ සභාපති උපුල් රෝහණ මහතා කියා සිටියේ කොරෝනා නෛරදය නැවත වතාවක් රට පුරා සීග්‍රයෙන් පැතිර යමින් ඇති බවයි.
නමුත් එම ආසාදිතයන් හඳුනාගන්නේ ඉතා සුලු වශයෙන් බවත් ඊට හේතු වී ඇත්තේ ආසාධිතයන් හඳුනාගන්නා පරීක්ෂණ සිදු නොකිරීම බවද ඔහු පැවසීය.
කොරෝනා එන්නතේ කුමන හෝ මාත්‍රාවක ප්‍රතිශක්තිකරණය පවතින්නේ මාස හයක පමණ කාලයක් පමණක් බවත් එම කාල සීමාව ඉක්මවා ඇති නම් ඕනෑම අයෙකු යලිත් එන්නත් මාත්‍රාවක් ලබා ගන්නා ලෙසත් ඔහු ජනතාවගෙන් ඉල්ලා සිටියේය.
කොරෝනා වසංගතයක් රට තුළ තිබූ බව අමතක කර කටයුතු කළහොත් නැවත වතාවක් රට වසා දැමීමට සිදු වනු ඇති බවද එසේ සිදු කිරීම හෝ නොකිරීම තීරණය වන්නේ ජනතාවගේ හැසිරීම මත බවද ඔහු තවදුරටත් කියා සිටියේය.
